បើកត្រាក់ទ័រភ្ជួរដីប៉ះលើមីនតោន (Video)
ខេត្តបាត់ដំបង ៖ បុរសម្នាក់បានបើកត្រាក់ទ័រភ្ជួរដីចំការ ដែលធ្លាប់ភ្ជួរជារៀងរាល់ឆ្នាំ បានកិនចំគ្រាប់មីនតោនកប់ក្នុងដី បណ្ដាលឱ្យផ្ទុះស្លាប់ភ្លាមៗនៅនឹងកន្លែង កាលពីរសៀលថ្ងៃទី០១ កញ្ញា ២០១៦ ស្ថិតនៅក្នុងភូមិបួររុន ឃុំត្រែង ស្រុករតនៈមណ្ឌល ខណៈត្រាក់ទ័រ បានរងការខូចខាតទាំងស្រុង ។
ប្រភពឱ្យដឹងថា ជនរងគ្រោះឈ្មោះជិន កំសាន ភេទប្រុស អាយុ៣៣ឆ្នាំ ជាកសិករ រស់នៅក្នុងភូមិ-ឃុំកើតហេតុ ។ ប្រភពបន្តថា ជនរងគ្រោះបើកត្រាក់ទ័រភ្ជួរដីចំការរបស់ខ្លួនដែលធ្លាប់ភ្ជួរដាំដំណាំរាល់ឆ្នាំ មិនដែលជួបបញ្ហាអ្វីឡើយ លុះឆ្នាំនេះ ចុះភ្ជួរជាថ្មីស្រាប់តែជួបគ្រោះថ្នាក់តែម្ដង ។ ប្រភពដដែលបញ្ជាក់ថា ជនរងគ្រោះបានស្លាប់ភ្លាមៗនៅកន្លែងកើតហេតុ រីឯត្រាក់ទ័របានរងការខូចខាតទាំងស្រុងតែម្ដង។
ជុំវិញករណីផ្ទុះមីនតោនក្នុងដីចំការ បាននិងកំពុងធ្វើឲ្យអ្នកភូមិ ដែលមានដីចំការនៅតំបន់មានការព្រួយបារម្ភគ្រប់ៗគ្នាអំពីសុវត្ថិភាព។ អ្នកភូមិបាននិយាយថា កន្លងមក ធ្លាប់មានករណីផ្ទុះមីនដូចគ្នានេះដែរ តែបានកើតឡើងយួរឆ្នាំហើយ ប៉ុន្តែគេមិននឹកស្មានថា នៅតែមានគ្រាប់មីននៅសេសសល់កប់ក្នុងដីទៀតសោះ ។ ប្រជាពលរដ្ឋបានបញ្ជាក់ថា ដីចំការរបស់ឈ្មោះជិន កំសាន នេះ ក៏ធ្លាប់ភ្ជួររាល់ឆ្នាំដែរ ហើយមិនដែលមានបញ្ហាទេ តែនៅពេលចុះភ្ជួរឆ្នាំនេះ ស្រាប់តែប៉ះចំគ្រាប់មីនតោនផ្ទុះស្លាប់ទាំងមនុស្ស ខូចទាំងត្រាក់ទ័រខ្ទេចខ្ទីអស់គ្មានសល់តែម្ដង។
បើតាមមន្ត្រីមូលដ្ធានបាននិយាយអំពីប្រវត្តិទីតាំងនៅតំបន់នោះថា កាលដើមតំបន់នោះ ជាតំបន់សមរភូមិក្ដៅ កាលពីសម័យសង្គ្រាម ក្នុងទសវត្សឆ្នាំ៨០ ប៉ុន្តែក្រោយកម្លាំងខ្មែរក្រហម ធ្វើសមាហរ័ណកម្ម ពលរដ្ធបានចូលកាប់រានដីព្រៃនៅតំបន់នោះ ដើម្បីធ្វើចំការរហូតមកដល់សព្វថ្ងៃនេះ ។
ប្រភពដដែលបញ្ជាក់ថា ពិតមែនតែដីនៅតំបន់នោះ បច្ចុប្បន្នបានក្លាយជាវាលរហោឋាន ពោរពេញទៅដោយដំណាំកសិកម្ម តែអាចនៅមានគ្រាប់យុទ្ធភណ្ឌមិនទាន់ផ្ទុះ នៅសេសសល់កប់រាយប៉ាយ នៅក្នុងដីនៅឡើយ ។ ដូច្នេះ ប្រជាកសិករ គួរតែមានការប្រុងប្រយ័ត្ន ក្នុងការបង្កបង្កើនផល ចៀសវាងគ្រោះថ្នាក់ ដែលអាចកើតឡើងដោយយថាហេតុ ។
ប្រភពៈកោះសន្តិភាព
